Banyaknya Masalah, Biking Warga Bingung: Dong Mau Pi Pilih Ka Seng Ni?

BANYAK masalah masih melilit warga di daerah-daerah di Maluku maupun di kota Ambon.

Sebagai Provinsi tertua di Indonesia, pembangunan di daerah ini masih jauh tertinggal bila dibandingkan Provinsi lain di Indonesia.

Masalah-masalah pembangunan yang dihadapi daerah ini seperti masalah sosial, masalah ekonomi, bencana alam, masalah kesehatan, masalah keamanan, bahkan saat ini dihadapi warga adalah masalah menentukan pilihan terhadap calon wakil rakyat yang akan duduk di DPRD Maluku, DPRD Kabupaten maupun DPRD Kota.

Wakil rakyat yang seharusnya mengawal aspirasi rakyat dari pusat sampai ke daerah terpencil, ternyata tidak mampu berbuat banyak. Sehingga warga mengistilahkan wakil rakyat itu dengan sebutan 4D, "Datang-Duduk-Diam-Duit".

Selain wakil rakyat, lembaga pemilu yang sudah bertahun-tahun lahir di bumi ini juga belum menunjukan kedewasaannya dalam penyelenggaraan sejumlah agenda pemilihan kepala daerah (Pilkada), bahkan memasuki masa pemilihan legislatif tahun ini, dua lembaga yakni KPU dan Bawaslu belum menunjukan perubahan karena masih dicurigai disusupi kepentingan tertentu bahkan dinilai tidak mampu melaksanakan aturan yang ada.

Dampak dari masalah-masalah tersebut membuat kepercayaan warga menjadi surut, terbukti pada pelaksanaan Pilkada 2013 lalu, jumlah Golongan Putih (Golput) di daerah ini terus meningkat hampir mencapai 50 persen.

Warga mengaku bingung. Sebagian besar mengaku belum punya pendirian untuk memilih calon legislatif (caleg) DPRD Provinsi dan DPRD Kota Ambon tahun 2014 ini. Padahal, pelaksanaan pemilu legislatif (pileg) tinggal beberapa hari lagi.

Sikap warga itu sangat beralasan, karena sosialisasi terkait tata cara pencoblosan dan lain sebagainya juga belum tuntas dilakukan di seluruh wilayah di Maluku, seperti di wilayah pegunungan dan wilayah-wilayah terpencil.

Pers yang punya kemampuan melakukan sosialisasi itu sudah berupaya maksimal namun tidak bisa berbuat banyak karena pihak Penyelenggara selalu berkelit miliki anggaran yang minim. Itu sebabnya pers tidak mau disalahkan jika nanti golput di daerah ini benar-benar meningkat.

Untuk memperbincangkan masalah ini, sebaiknya katong ikuti apa kata Om Koko (OK) deng Om Maku (OM) dalam bastori ala Tali Kepang kali ini;

OM: Slamat siang Koko....ada biking apa tu tamang??

OK: Eh, Maku...su lama e katong seng baku dapa....beta ada baca brita ni kio...

OM: Brita apa tu tamang??

OK: Brita pemilu....kan kurang brapa hari lai, katong su maso par pilih calon legislatif ni kio...

OM: Ooo iyo ale....mar beta mau tanya, pileg tu tanggal brapa la tamang? jang marah kio....beta seng iko perkembangan ni?

OK: Tanggal 9 April to, masa ale seng tau....makanya iko perkembangan brita tu sadiki. Jang cuma tau par hitong kepeng saja mar hal laeng seng tau...

OM: Sio, jang marah tamang e...beta ni su talalu sibuk deng uros ini, uros itu kio. Soalnya seng ada yang kas tau par beta ni...untong beta datang par ale ni la baru beta bisa tau.

OK: Bapa kala....ini su tanggal brapa kong ale masih bingong....jadi memang ale ni batul-batul seng tau ka? Ini kan pesta basar to....pesta negara ni kio....

OM: Iyo tamang e....par ale tu bae karna suka iko perkembangan dunya. Kalo beta ni kan tinggal di gunung to, jadi kurang informasi kio...hehehe...

OK: Hmmmm...

OM: Beta ni mo tanya dolo,...kira-kira ale ni su ada pung pilihan par caleg deng partai ka balong??

OK: Beta yang tiap hari iko perkembangan sa masih bingong mo...mo pilih ka seng....mau pilih caleg deng partai yang bagemana ni.

OM: Barang kanapa tu kong ale bingong.....padahal tiap hari ada iko perkembangan tu!!

OK: Bagini tamang....katong ni kan su blajar dar pengalaman 5 taong sampe deng pilkada kamareng....wakil rakyat ni dong macang seng merakyat kio....lia saja waktu katong dapa musibah, dapa hantam dar banjir 2 taong sampe deng taong kamareng ni, tar ada satu lai yang tanya par katong ni kata ada kurang apa ka....balong lai masalah keamanan di mana-mana yang balong dituntaskan.....pokoknya masih banyak masalah kio....apalai dong yang dipercayakan di lembaga pemilu ni jua seng maksimal, masih banyak kecurangan ale....lalu deng masalah bagitu, beta ni musti bagemana lai....mau pilih ka seng?? Bingong kio...

OM: Ale saja masih bingong....masih ragu-ragu....kong beta ni mo jadi apa lai. Lalu ale tu pung mau bagemana??? 

OK: Bagini tamang....memang beta lia masih ada harapan....ada caleg incumbent yang bagus....biar hitong deng jari.....yang incumbent ni katong kan su lia dong biking apa......nah dong yang bagus tu katong pilih dong lai jua.....yang biasa datang, dudu, diam deng duit itu jang pilih dong lai....

OM: Kalo caleg baru??

OK: Kalo caleg yang baru ni, katong pake istilah "pilih duriang"

OM: Maksudnya??

OK: Kalo katong mau pilih Duriang tu, kan katong musti lia dar luar dolo to....apa akang tu bae ka busu...supaya seng rugi, katong ciong akang pung bobou dolo. Kalo akang bobou enak, mar jang langsung ambel dolo, tapi suruh dong bala akang lai par lia isi kata sesuai deng ale pung mau ka seng.....jang bagini duriang tu bobo enak padahal busu di dalang....ka bagemana!!

OM: Oooo....itu batul lai....ini cara memilih yang bagus lai. Jadi....kalo durian samua busu tu bagemana lai....??

OK: Masa samua yang busu tu ale beli....kan pambodo namanya.

OM: Batul lai ale.....

OK: Makanya pilih tu pake otak, jang asal pilih, nanti menyasal iko blakang

OM: Mar susah lai par tau dong pung isi kapala tu kata akang ada apa.... 

OK: Kalo par beta pung mau tu bagini....kan ada caleg incumbent...lalu ada caleg yang baru...beta pung mau tu kalo dong biking pendekatan deng warga lewat ibadah saja.....maksud beta, dong panggel pendeta ka, ustad ka....la dong biking sombayang sama-sama deng warga....bila perlu biking komitmen atau dong pung janji tu skalian di depan pendeta deng ustad kio....deng cara bagitu, katong su seng pikir lai...katong serahkan saja par Tuangala deng dong pung janji-janji tu....

OM: Hahaha....bisa lai ale...mar sama saja tamang e....ini kan politik. Politik ni jua ada yang bae deng ada yang kotor. Tergantung orangnya deng partainya saja kio.

OK: Beta bilang bagini karna karna ada caleg yang suka barmaeng curang deng kas kepeng par warga....money politik!! Ini kan cara-cara yang sangat bardosa kio.....warga ni dong kira barang kaapa kong bisa dong bali bagitu saja.....kalo warga yang mata kepeng tu bole...gampangan to!!

OM: Pokoknya katong pilih caleg yang taku par Tuangala......kalo caleg yang seng takotang par Tuangala, beta minta ampong jua....beta mungkin seng pi tusu dong lai!!

OK: Satuju tamang....mar masih ada banya mo caleg yang takotang par Tuangala....

OM: Oke...Koko e....beta mau bilang, skarang ni kan banyak ana-ana muda yang baru mau iko pemilu ...menurut ale, ana muda ni dong bagemana la. Dong su mangarti par pilih caleg tu ka balong??

OK: Ana-anak yang baru ni dong kan masih polos kio, dong blong pung pengalaman....balong tau banya soal-soal bagini dan gampang terpengaruh...itu makanya para caleg, partai, deng lembaga pemilu tu harus berusaha kras supaya dong ana muda ni bisa ambel bagian lai di pileg deng pilpres.......dong harus kasih pendidikan politik lewat sosialisasi yang batul yang bisa membangun ana-ana tu pung wawasan....ana-ana muda skarang ni kang, dong su kritis deng masalah yang ada....mar ada lai yang masih pambodo deng gampang terpengaruh....mar beta yakin, ana-ana muda ini dong ada pung keinginan par iko pemilu....cuma jang dong ana-ana baru ni dimanfaatkan par kepentingan saja.....

OM: Itu sudah.....mar beta ni dengar, ada yang su dapa kepeng dar caleg....

OK: Kanapa ale seng pi lapor saja ka Panwas.....

OM: Parcuma Koko e......sama saja, katong lapor jua par biking ilang waktu....

OK: Hahaha....ale ni jang bagitu. Itu kan seng membantu pemerintah kio...

OM: Kalo lembaga pengawas pemilu ni dong su barubah boleh....mar kalo masih sama deng dolo-dolo...sudah jua. Beta tar nodek...

OK: Tamang e....caleg di Ambon ni pung jumlah su talalu banya lai....yang beta dengar ada kira-kira 400 caleg lebih yang maju manggurebe par dapa 35 kursi......di dalam partai sa ada 6 sampe 9 caleg yang bersaing par dapa suara banya.....ini balong deng partai laeng lai.....beta takotakang, dong caleg ni nanti akan sama deng "katang dalang loyang"....laeng hela-hela laeng kas jatuh...

OM: Maksudnya......???

OK: Maksudnya bagini tamang....dong ni kan pung harapan par bisa dudu di parlemen....beta kira kalo dong yang banya ni seng lolos jadi anggota dewan, bisa bahaya to....

OM: Bahaya apa tu??

OK: Kalo dong seng dapa kursi di dewan, bisa-bisa dong jadi stres kio.....abis caleg ni dong su banya buang waktu, buang tenaga, buang kepeng....lalu kalo dong seng dapa akang lai bagemana....bisa stres ka seng e....??

OM: Koko e....caleg tu su musti siap mental.....jadi seng usah pikir sampe ka situ...beta rasa caleg dong tu su siap kalah dan siap menang...

OK: Jadi bagini Maku....beta mau jelaskan par ale soal caleg yang beta bilang tadi tu pung potensi bisa stres tu bagemana. Bagini tamang..ini ada tipikal caleg yang berkembang dalam pemilu di Indonesia. Pertama, dong yang pung kepeng termasuk incumbent. Kedua, dong yang seng pung kepeng mar pung idelisme. Ketiga, yang seng pung kepeng deng seng pung idialisme. Caleg tipe yang satu tu biasanya relatif stabil biar dong kalah lai. Mar umumnya dong menang karna banyak kepeng dan yang incumbent tu banya pengalaman. Sedangkan dong yang tergolong tipe dua tu kebanyakan dari akdemisi, pengamat, atau pegiat LSM, yang juga relatif lebih stabil secara kejiwaan ketika kalah. Sementara tipe ketiga ni yang pung potensi bisa stres dan ujung-ujungnya banyak yang dibawa ke rumah sakit.

OM: Ooo, bagitu e....memang jadi caleg tu seng gampang kio. Mar beta takotang ale...karna beta lia banyak caleg ni yang pung tipikal seperti yang ale bilang terakhir tu...

OK: Kalo menurut beta, sebaiknya para caleg tu rasa-rasa diri jua deng su musti siap-siap dar skarang....

OM: Itu akang sudah....makanya jadi caleg tu su harus siap kalah dan siap menang...bagitu ka tamang...??

OK: Iyo...mar Jadi caleg tu jua harus jelas kio....jang parlente putar bale kalo su dudu di kursi dewan.....

OM: Tamang e....beta ada dengar, kata akang golput kali ini bisa meningkat di Maluku. Itu barang kanapa la?? 

OK: Hmm...yang ale tanya ni memang paleng ditakuti. Ini mungkin karna kurang soisalisasi kaapa 

OM: Mungkin warga su talalu kecewa kapa e deng pemilu sebelumnya......

OK: Seng bisa bilang akang lai kawan...masalah masih banya yang seng bisa dong biking abis akang....malahan ada yang kecewa sampe mau boikot pemilu ni.......mar mudah-mudahan seng bagitu kio......dan mudah-mudahan juga caleg yang skarang ni dong bisa pegang dong pung janji par bangun Maluku deng kota Ambon...

OM: Yahh...Mudah-mudahan lah...

OK: Oke tamang, katong tunggu saja...apa nanti ada perubahan kaseng....kalo pileg kali ini seng ada perubahan......beta takotang, orang su seng mau parcaya lai??

OM: Mudah-mudahan seng bagitu....

OK: Mantab.....kalo bagitu katong bubar dolo e...beta mau jalan dolo ni

OM: Oke tamang, sampe baku dapa lai...

OK: Ehhh...sabar dolo tamang....tanggal 9 ni ale jadi pi tusu ka seng??

OM: Hmmm.....Nanti lia jua......mudah-mudahan beta bisa iko....kalo ale bagemana???

OK: Sio tamang e....ini kan katong negara pung hajatan....biar ada yang biking dosa, mar jang katong biking dosa lai....par beta, loko katong pi tusu dong jua kaapa....katong iko aturan pemerintah jua, karena pemerintah tu kan alat Tuhan di dunya ni kio....

OM: Bisa lai....makanya, pemerintah tu jua musti takotang Tuangala lai....kalo gitu, ale bilang ana-ana muda jua par dong jang iko berdosa...suruh dong pi tusu kasana jua.....supaya pembangunan ni akang bisa bajalang deng lancar...

OK: Oke tamang.....sampe jumpa.


===AMATOOO====