Kanapa Akang Penyaki HIV/AIDS di Maluku Ni Akang Tarus Meningkat?

ACQUIRED Immunodeficiency Syndrome (HIV/AIDS) adalah sekumpulan gejala dan infeksi (atau: sindrom) yang timbul karena rusaknya sistem kekebalan tubuh manusia akibat infeksi virus HIV atau infeksi virus-virus lain yang mirip yang menyerang spesies lainnya (SIV, FIV, dan lain-lain).

Virusnya sendiri bernama Human Immunodeficiency Virus (atau disingkat HIV) yaitu virus yang memperlemah kekebalan pada tubuh manusia. Orang yang terkena virus ini akan menjadi rentan terhadap infeksi oportunistik ataupun mudah terkena tumor.

Meskipun penanganan yang telah ada dapat memperlambat laju perkembangan virus, namun penyakit ini belum benar-benar bisa disembuhkan.

Di Provinsi Maluku penularan HIV/AIDS adalah yang paling tertinggi pada peringkat ke 2 di Indonesia dengan angka penderita sebanyak 2.237, sementara di Kota Ambon sendiri menjadi peringkat pertama di Maluku dengan angka penderita HIV/AIDS sebanyak 1.357 kasus yang teridentivikasi. Lebih banyak penderita yang mengidap penyakit ini di Maluku dan Ambon adalah kaum ibu rumah tangga.

Menurut Wali Kota Ambon, Richard Louhenapessy, dalam teori HIV/AIDS, kalau dihitung presentase jumlahnya maka kalau 1 orang terdeteksi HIV/AIDS maka diperkirakan ada 100 orang penderita. ‘’Jadi kalau ada 1.400 orang terdeteksi maka bisa diperkirakan paling tidak ada 14 ribu orang di Kota Ambon terindikasi mengidap virus ini.’’

Lalu apa kata Om Koko (OK) dan Om Maku (OM) sebagai orang Maluku dalam menyikapi kondisi ini. Mari katong iko percakapan kedua orang tatua ini lewat bastori ala Tali Kepang:

OK: Maku e, su lama ni katong baru baku dapa lai....mar ale ni dar mana tamang kong su lia macang kata marsegu bagitu. Ale ni ada minong sopi lai kapa?

OM: Koko, itu sudah tamang....mar beta ni ada pung tekad di taong 2014 ni beta minta pensiong jua deng akang barang bodo ni

OK: Ale bilang pensiong di taong 2014 ni mar ale masih torana sopi tu tarus!

OM: Sabar dolo Koko...beta ni balong jelaskan akang sampe abis, mar ale su langsung potong beta pung bicara ni.

OK: Oke tamang lanjut...

OM: Bagini tamang, beta ni su janji par beta pung diri deng akang minuman tu supaya bulan ini beta pansiong jua...jadi nanti bulan Februari ni beta su tar akang sonto barang tu lai.

OK: Mantap tamang

OM: Koko e...tadi tu beta ada dudu deng anak-anak muda di jiku lorong Kolonel Piters...beta ni sebenarnya seng minong akang barang tu, mar ini pergaulan antara ana-ana muda deng orang tatua kio....jadi tadi tu katong minong mar katong jua ada bahas kahidopan sadiki ni deng akang masalah HIV/ADIS yang di kota Ambon.

OK: Kanapa ale bicara deng pamabo-pamabo tu, biking ilang waktu bicara bagitu deng dong tamang, karna yang dong bicara itu akang maso talinga kanan, kaluar talinga kiri.

OM: Koko e, sebagai orang tatua, beta pung tanggungjawab kas pembinaan par generasi muda ni kio, sapa tau akang bisa bermanfaat....deng katong seng bole lia ana-ana tu dong bagitu tarus, musti katong biking perubahan kio.

OK: Lalu ale bilang apa par dong tu tamang.

OM: Beta ni cuma kas inga dong saja. Beta bilang par dong kalo  minuman tu akang bisa biking katong lupa diri...apalai kalo minong su talalu banya deng apalai ada kepeng banya di panta sak, lalu dong baku cabar par pi ka karaoke par satu dua lagu...mar beta takotang kalo dong su sampe di sana deng kondisi mabo tu, dong pasti dipengaruhi deng akang parampuang tu kio....

OK: Itu akang sudah....lalu dong bilang apa tu Maku

OM: Dong bilang, selagi masih ada kepeng deng masih muda ni, seng bisa ada yang pele....

OK: Ooo...bagitu e. Mar dong seng takotang akang penyaki tu ka

OM: Dong bilang, dong di karaoke tu su kas jaminan kalo parampuang yang karja di akang tampa tu seng ada penyaki, karna ada dokter yang datang par cek up...

OK: Lalu ale cuma dengar saja ka.. ada solusi par dong ka seng....

OM: Koko e...beta ni jua paranah maso karaoke....karna itu beta bilang par dong, mana ada pengusaha karaoke tu mau jujur par dong pung pelanggan, deng mana katong ada dapa lia kata akang dokter yang datang par priksa akang parampuang tu....jadi beta bilang par dong, ana-ana e, resiko yang paleng bahaya par dapa penyaki tu akang paleng gampang ada di tampa hiburan malam ni....kanapa beta bilang bagitu, karna di situ sapa mau tau deng sapa, apalai su deng mabo barat, pasti pikirang tar batul kio....jadi disana kalo dong su baku dapa deng akang parampuang rok pende deng paha kasbi kupas, apalai kong parampuang tu su sonto aer karas su pasti dong pung pikiran jua sama-sama jadi takaruang...apalai kong akang parampuang disana tu istilahnya "samua punya," jadi seng ada yang bisa pele kalo ada pung kepeng banya.....

OK: Iya e Maku, kalo su mabo brat deng hati su gili-gili, pasti akang dalang mulo tu haringang jua par rayu akang parampuang tu....ada pantas kong penyakitan ni akang seng stop. Mar beta mau bilang ni, penyaki bagitu tu bukang saja berasal dari tampa hiburan malam, mar skarang ni akang su disamua tampa, jadi musti hati-hati kio tamang e

OM: Itu sudah.....seng bisa pele lai tamang

OK: Maku e, kalo beta pikir, khusus par tampa hiburan malam ni musti dong dar pemerintah tu mangente akang tarus karna ada indikasi, akang tampa tu paleng beresiko menularkan penyaki termasuk HIV/AIDS....jadi pemerintah dong musti mangente akang tampa tu tarus jua, dalam hal ini dinas kesehatan, musti tarus kontrol....

OM: Memang harus ada pengawasan oleh pihak terkait, apalai di Maluku ni penyaki HIV/AIDS su banya menular di kalangan masyarakat.....mar beta harap, bapa Wali Kota deng bapa Gubernur tu su musti biking program prioritas par akang penyakit tu....dong di dewan tu jua musti serius lai par bahas akang penyakit tu.....

OK: Memang betul tamang....pemerintah harus prioritas masalah ini, jang cuma par Pilkada saja lalu dong kas cair anggaran ratusan miliar, hal macang bagini jua kan dong musti serius lai kio.

OM: Koko e....kalau benar penyaki ni akang su jadi ancaman par generasi katong di Maluku, lalu kalo pemerintah dong seng serius lai, beta takotang nanti akang penyaki ni seng bakurang mar akang tambah hebat.


OK: itu akang sudah tamang....mar beta optimis saat ini masyarakat Maluku su smakin sadar deng akang bahaya penykni ni....

OM: Mudah-mudahan lah....

OK: Jadi beta minta ale jua bisa bilang par akang ana-anak muda, apalai par dong yang su kaweng-kaweng tu supaya jang lupa par jaga dong pung diri deng jang talalu bajingan lai....beta rasa keluarga tu lebe penting dar samua hal...lalu yang paleng penting tu bilang dong jang lupa sombayang banya-banya jua...

OM: Batul sakali tamang, nanti kong beta kas inga dong jua...

OK: Maku e...biar dong bilang pimpinan umat par kas inga lai, mar samua tu dar diri sandiri deng keluarga, orang tua deng ana-ana, ade deng kaka, musti laeng kas inga-inga laeng kio...beta rasa deng cara bagini akang paleng bae par bantu mengurangi resiko penularan ke orang lain.

OM: Koko e...beta ni dapa informasi, katanya ada praktek perdagangan seks di Ambon di beberapa tampa.....

OK: Di tampa mana tu tamang....

OM: Di Ambon Plaza tu kio...Yang beta dengar, skarang ini ada ana-ana parampuang nakal yang mondar-mandir seng tau par cari apa disana....mar ada jua tua-tua bangka yang suka onosel jua par cari mangsa di sana lai....dong cari akang ana-ana muda tu lalu dong kas kode deng tangan, pokoknya deng sgala macang cara....

OK: Ooo...bagitu e....jang sampe ale sandiri yang jadi tua bangka tu kapa e...

OM: Beta palungo ose pung dalang muka ni, ose kira beta ni bajingan ka!!

OK: hahaha....memang batul ka ada praktek bagitu di Amplaz??....jang sampe ale ni salah dengar tamang, makanya musti cek bae-bae dolo jang sampe itu cuma isu lai....

OM: Bisa lai, mar nanti beta cek kombali dolo e...

OK: Mantap....

OM: Kalo bagitu, katong koma dolo kapa e...

OK: Oke tamang, sampe jumpa....

---(wg)----