Yang Legal Tu, Dong Bisa Biking Jadi Ilegal

ILEGAL itu kan tidak sah, tidak sesuai dengan aturan hukum. Meski begitu, banyak kali pihak yang melakukan perbuatan ilegal itu, pura-pura tak dihiraukan oleh aparat hukum. Aparat hukum sering tidak serius melakukan tugasnya untuk menghukum setiap perbuatan ilegal yang dilakukan di daerah ini. Banyak alasan yang dibuat-buat untuk meloloskan para pelaku kejahatan yang jelas-jelas merugikan masyarakat, bahkan negara ini. Lalu apa kata om Maku (OM) deng Om Koko(OK) dalam perbincangan ala Tali Kepang ini.

OM: Koko e...su lama ni katong seng baku dapa ni?!
OK: Maku e, jang marah tuang, ampong beta dar ujung rambu sampe ka ujong kaki ni jua. Beta ni kang lagi sibuk uros usaha.

OM: Usaha apa tu Koko e....ale tu su macang kata pengusaha satu lai.

OK: Beta ni lagi usaha minyak tanah kio...ini par sambung hidop to. Kalo seng bagitu mana dapor tu akang bisa ba'asap.

OM: Hahaha....ale memang batu. Mar beta mau bilang par ale tamang. Usaha tu musti sesuai aturan, artinya ale jang makang untung talalu banya lai, la biking susah masyarakat. Inga-inga jua, mampos tu hukuman barat tamang.

OK: Maku, ale bilang tu batul. Mar Beta ni biking usaha par mencukupi kebutuhan keluarga. Selain itu beta pikir, kalo beta seng jual akang barang ni la sapa tu lai yang mau biking akang di dalang kampong spanggal ni...

OM: Itu pekerjaan yang mulia, mar sebagai tamang beta mau kas inga jua, kalo ale usaha tu bae-bae kio, jang sampe parlente putar bale deng akang usaha ni, maksudnya sesuai aturan lah dan kalo ukor minya tu tar batul deng makang sadiki dar akang jualan tu, beta takotang jang sampe mampos bagini la minyak tu akang bakar ale di naraka sana.

OK: Hahaha....ale ni lucu lai Maku e.

OM: Eh...Koko. Ale su baca berita ka balong, soal BBM ilegal yang katanya ada belasan ton yang dong selundupkan di Buru Selatan sana.

OK: Oh...itu britanya su di samua media Maku. Beta su baca sampe di akang pung sleker-sleker. Lalu menurut ale tu bagemana, kong berita tu kan akang su jelas kio, su ada perusahan yang dapa tau drop akang BBM ilegal, mar knapa dong aparat tu seng cepat ambel tindakan, dong musti biking alasan ini deng itu. Pusing ale!

OM: Itu sudah Koko e. Beta herang...padahal ini kan negara hukum, jadi mustinya setiap perbuatan hukum yang sudah ada barang bukti, saksi deng pelaku tu su musti cepat di proses supaya masyarakat tu dong bisa batul-batul parcaya par aparat. Mar beta herang, knapa aparat hukum ni dong seng bertindak tegas dan cepat par menyelamatkan akang BBM tu...beta pikir, mungkin dong aparat ni pung gaji tu akang seng cukop kapa e kong dong lia macang sama kata ayam ada dapa sirang deng aer ujang.

OK: Jaman ni kan orang butuh kepeng yang banya tamang par bali ini, bali itu...jadi dong musti bisa maen drama di atas panggung sandiwara to.

OM: Kalo seng bisa jadi aparat, lebe bae dong jadi pengusaha jua.

OK: Pengusaha yang kacil macang beta ni mau makang untong basar tu kan susah tamang...mar par pengusaha basar ni dong mau untong basar tu gampang kio. Dong biking samua yang legal tu jadi seng legal. Lalu su bagitu, dong aparat ni lai, iko dong pengusaha pung mau, maksudnya kalo su tau itu melanggar hukum, la dong kasih inga jua par pengusaha yang pung rencana tar bai tu. Mar kalo aparat yang su blajar hukum ni dong tergiur deng fee yang banya, beta rasa negara ni bisa ancor lele.

OM: Bukang ancor lele lai tamang, mar ancor di kabong-kabong....

OK: Hahahha....sama tu jua kio.

OM: Beta baca brita kamareng tu, katanya dong mau jual akang BBM tu...

OK: Ah...itu dong cari akal saja par dapa untong tu kio. Mar beta rasa dong pemerintah disana tu harus tau aturan, maksudnya itu kan barang bukti yang harus digunakan dalam proses hukum nanti, kalo barang tu su jual, itu sama saja deng menghilangkan barang bukti kio.

OM: Beta seng tau aturan macang bagitu tamang... beta ni bukan pakar. Mar setau beta, BBM ilegal yang ditahan itu kan barang bukti, knapa musti dijual??

OK: Sebagai masyarakat biasa, beta pikir, samua tu akang gampang saja tamang. Kalo aparat hukum tu dong benar-benar serius bertindak sesuai autran....beta rasa samua pasti aman kio.

OM: Itu su biasa terjadi di negara ini, aparat hukum yang katong percaya seng bertindak sesuai aturan malah sebaliknya bertindak ilegal. Masalah ni bukang jadi par BBM saja, mar samua hal termasuk deng pilkada.

OK: Jadi kesimpulannya, karena aparat bertindak ilegal maka samua jadi ilegal...gitu ka tamang.

OM: Itu sudah...memang seng samua aparat tu dong bagitu. Ada yang sesuai aturan, mar ada jua yang seng sesuai aturan.

OK: Kalo bagitu, masalah BBM ilegal di Bursel tu kalo dong seng bisa selesaikan secara hukum ka, lalu mau bawa akang masalah tu par aparat sapa lai yang katong percaya??

OM: Ale parcaya saja par tuangala, karna antua basar tu seng parnah parlente tamang!

OK: Stuju tamang!

OM: Jadi beta kas inga ale skarang jua tamang, kalo ale ada pung usaha ni, lebe bae mulai skarang ale sombayang banya supaya nanti untong yang ale dapa tu bisa jadi berkat par keluarga...jang bagini setang su tandang, iblis tola, la ale biking hal ilegal. Inga untong sadiki tu lama lama jadi banya kio....yang penting katong samua pung hati sanang, poro kanyang la pikiran jadi tenang.

OK: Dangke lai tamang e...ale pung hokmat tu beta akan usaha biking akang.

OM: Mantab....kalo gitu katong koma dolo kapa e

OK: Sip!

***Amatooo****

---wg---