Harga Listrik Nai Tarus, Mar Lampu di Ambon Tiap Kali Tetap Mampos Jua

DISINYALIR hampir setiap tahun terjadi pemadaman aliran listrik di kota Ambon dan sekitarnya. Pemadaman aliran listrik di Ambon diakui kepala PLN cabang Ambon akibat adanya perbaikan mesin pada PLTD Wika yang terletak di Galala, Kecamatan Sirimau, Kota Ambon. Namun pemadaman itu selalu meresahkan para pelanggan terutama para pengusaha. Mari katong ikuti apa kata Om Maku (OM) deng Om Koko (OK) dalam bastori ala Tali Kepang. Kali ini dong dua bastori lewat telpon;

OK: Halo...haloo...Maku!!

OM: Halo, Koko...bagemana tu tamang?

OK: Beta mau cek dolo....ale pung tante lis disitu su mampos ka ada bae-bae?

OM: Maksud ale, tante lis sapa la?

OK: Maksud beta, listrik tamang....ale pung listrik disitu ada hidop ka ada mampos?

OM: Tuangampong Koko e, beta kira tante lis sapa lai....hahaha....listrik ni skarang akang ada mampos tiap hari seng brenti ni ale!

OK: Hayo ee....beta ni su pastiu deng akang lampu ni, akang lampu ni biking katong pung cucu di rumah su seng bisa blajar bae-bae ale....mau pake strongken deng palita jua su seng ada jaman lai, lalu mau pake lilin mar beta takotang jang sampe bagini katong tabakar par saika!

OM: Ale tu kan pung usaha ada to, ada kepeng banya tu la bali genset satu jua tamang!

OK: Katong pake genset par biking baribot deng ba asap saja....parcuma beta bayar listrik mahal-mahal deng tepat waktu. Beta ni seng mau rugi tamang...masa katong mau biking untung PLN tarus mar dong PLN seng biking katong pung hati sanang sadiki lai ale, malah katong warga apalai par pengusaha, dong tambah rugi lai...

OM: Jang ucap akang lai tamang.....harga listrik setiap taong jua akang nai tarus kio, la kalo harga tu akang su nai bagitu la dong pung pelayanan tu akang meningkat ka, mar ini seng lai, dong biking alasan tarus....baru alasan tu tiap kali bagitu-bagitu saja, macang kata seng ada alasan laeng lai ka...

OK: Itu akang....Beta herang ale, dong pung alasan tu setiap taong sama....masalah cuma di masin...hayoo eee....dong pung hal bagini-bagini ni ada pantas kong katong di Ambon ni seng maju-maju.....

OM: Jadi katong ni musti biking bagemana supaya dong di PLN ni bisa tingkatkan dong pung pelayanan deng supaya lampu ni akang seng mampos tarus....padahal amper setiap saat ada pergantian pimpinan PLN yang baru, mar akang tetap bagitu-bagitu jua....

OK: Katong pung dewan jua dong seng bakuti sadiki lai ale.....coba dong di dewan panggel akang pimpinan PLN tu ka, la ator bagemana ka, supaya tiap taong ni seng ada masalah lai....supaya masyarakat deng pengusaha ni dong seng bamulu tarus....

OM: Mungkin mau dekat Natalan ni kapa la dong PLN tu biking lampu mati manyala macang kata pohon trang bagitu.....

OK: Hahaha.....ale ni bisa lai. Tapi kalo lampu mati tarus bagini, beta rasa dong PLN ada dapa untong banya kapa?

OM: Maksudnya, untung apa tu tamang....

OK: Iya to, kalo mesin seng bajalang berarti dong bisa irit minya to.....

OM: ooo....bagitu e....kira-kira kalo lampu mati selama dua minggu, PLN tu dong ada dapa untong brapa banya dar minya la?

OK: yah....yang itu tu seng bisa beta kira-kira....mar yang jelas ada untong kio....lalu coba hitung saja dong pung biaya operasional tiap hari....kalo masin tu akang seng babunyi barang dua minggu, berarti minya tu seng berkurang kio.

OM: Bisa lai, mar dong pung minya tu subsidi ka non subsidi...la untong tu akang kamana la tamang....

OK: Nanti bilang wartawan saja yang tanya ka pimpinannya....

OM: Mar dong PLN bilang, katanya dong jua ada rugi lai tamang, karna masalah tunggakan...

OK: Seng mungkin dong rugi tamang, kalo rugi mana perusahan tu bisa jalan sampe skarang.....

OM: Hmmm....

OK: Oke...oke, katong koma dolo kapa, beta pung HP pung batrei ni akang su amper abis

OM: Sama tamang, gara-gara lampu mati ni, beta HP seng bisa charge ale...

OK: Sabar banya tamang.....salam par ale pung mamski lai

OM: Oke...sampe baku dapa lai!!!


*****Amatoooo*****

--wg--