Apa Benar Tsunami Tu Akan Datang Hantam Katong di Ambon?

Sosialisasi Gempa bumi di UKIM Ambon, (16/11/2013)

ISU akan terjadinya Tsunami di Ambon benar-benar heboh dan meresahkan warga, khususnya warga yang berdiam di sekitar pantai. Dikabarkan ada warga yang  panik dan terpaksa naik gunung untuk menghindari kemungkinan isu itu benar-benar terjadi.

Yang lucunya, ada warga terpaksa begadang sambil  mondar-mandir ke pantai untuk memantau pasang surut. Lebih heboh lagi di internet, banyak komentar beragam soal isu tsunami di Ambon. Ada yang  pesimis tapi ada pula yang optimis menganggapi isu tersebut.

Apakah benar akan ada Tsunami di Ambon seperti yang dikatakan sang profesor dari  Amerika itu? Lalu apa dan bagaimana pula kata Om Koko (OK) dan Om Maku (OM) selaku orang Ambon ketika menghadapi isu tersebut lewat bastori ala  Tali Kepang ini;

OK: Eh Maku, ale ni lia macang kata orang seng tidor dua hari bagitu!

OM: Koko e....ale tu ada bae, tinggal di gunung sana...mar beta ni tinggal di pinggir pante.

OK: Maksudnya apa tu tamang??

OM: Ale seng dengar ka...dong bilang Ambon ni akan sama deng Aceh

OK: Ooo...maksudnya Tsunami tu ka?

OM: Itu sudah!

OK: Pantas...ale ni lia panik paskali

OM: Kalo panik sandiri tu seng pa-pa tamang e....mar banyak orang yang su jadi panik ni. Kalo panik tambah deng hati jadi ancor lai, katong ni  bisa mati badiri-badiri.

OK: Sio...kasiang beta pung tamang satu ni ale.

OM: Menurut ale tu bagemana? Ada solusi ka seng?

OK: Tamang e, yang beta tau tu, berita tsunami yang dong biking itu akang masih balong jelas...maksud beta, kamareng tu, (16/11/2013) di Aula UKIM ada  2 pakar yang diundang ka Ambon par kasi sosialisasi mengenai Sejarah Gempa Bumi taong 1608 hingga 1825 yang pernah terjadi di  Ambon termasuk profesor dari Amerika tu. Sosialisasi tu pung maksud supaya katong ni warga bisa tau kalau gempa di Ambon tu terjadi taong brapa deng daerah mana saja yang  pernah dapa hantam dar tsunami. Lalu dari sosialisasi itu jua, warga bisa tau dan kalo nanti misalnya ada gempa besar yang berpotensi tsunami,  terutama par warga yang ada di pinggir pante tu supaya dong musti biking apa.

OM: Oooo....dong biking sosialisasi ka! bukan pernyataan resmi dari profesor tu ka??! Lalu sapa tu yang biking sosialisasi tu tamang?

OK: Yang beta tau tu...yang biking akang sosialisasi tu dari pihak BPBD Maluku. Nanti tanya jua dar dong yang biking deng dong yang iko  sosialisasi tu kata akang bagemana. Apa ada pernyataan resmi dari Profesor tu kata antua ada bilang akang tsunami tu nanti hantam Ambon sama deng Aceh ka bagemana. Jadi kegiatan sosialisasi itu jua sekaligus par pemerintah mau rencana biking forum PRB.

OM: Forum PRB tu apa? Lalu kanapa BPBD tu dong sosialisasi seng biking berita di samua media?

OK: PRB tu...forum rencana pengurangan resiko bencana. Di daerah lain akang barang ni dong su biking, mar di 11 kabupaten/kota di Maluku ni  balong ada...ale mangarti ka seng? Ini supaya ada anggaran basar lai to....karna yang dong undang ni pakar dari luar negeri....deng soal sosialisasi di media tu, BPBD bilang seng ada anggaran par  samua media......dong seng pikir ka kata dong ni biking sosialisasi tu deng anggaran puluhan juta karna ada undang pakar yang su tersohor deng ramalan di Aceh...itu kan makang anggaran seng kacil tamang e..

OM: Iyo ka...Ale ni macam tau bagitu? ale dengar dar mana kata BPBD bilang seng pung anggaran?

OK: Beta ni dapa bocoran dari wartawan. Katanya saat sosialisasi itu ada wartawan dari 7 media yang iko, mar cuma 2 media saja yang dong pake par muat akang berita tu. BPBD bilang dong seng pung kepeng par media laeng.

OM: Ooooo...bagitu ka. Pantas kong media laeng seng muat berita tu. Ini namanya diskriminasi.

OK: Itu akang sudah....masa media laeng seng buru berita besar seperti ini....seng mungkin kan....berita bencana Way Ela saja, mulai dar  longsor sampe deng jebol dong muat abis-abis kong berita akan terjadi tsunami ni masa kong media seng muat, la profesor tu dong sambunyi antua  dimana kong seng panggel media laeng tu par jelaskan akang....atau ini ada maksud dibalik "B" ada "U"...

OM: Di balik "Batu" ada "Udang" ka di balik "Bantal" ada "Uang"!

OK: Hahahahahahaaa.......

OM: Mar isu itu batul ka seng?

OK: Oeee tamang....Itu masih isu, balong ada pernyataan resmi dari pemerintah soal profesor tu pung hasil riset ilmiah....profesor kamareng tu  cuma kasih sosialisasi, antua seng kasih pernyataan resmi par wartawan yang ada iko sosialisasi tu bahwa akan terjadi tsunami di Ambon seperti  di Aceh....ale ni mangarti ka seng.

OM: Oooo...bagitu ka. Lalu pemerintah daerah dong pung tanggapan soal isu tsunami tu bagemana, karna warga ni su jadi panik paskali?

OK: Pemerintah tu musti panggel pihak-pihak yang biking akang isu tu par dong pertanggungjawabkan akang....tapi ale nanti tunggu saja kalo su  ada pernyataan resmi dar pemerintah...pemerintah tu kan corong par warga terutama soal ancaman bencana. Nanti akang pung hal sama deng Way Ela  sana.....pemerintah nanti koordinasi deng pihak terkait seperti BMKG, karna BMKG ni dong punya samua hal ada, terutama soal gempa bumi dan  tsunami.....kalo BPBD tu kan cuma badan penanggulangan bencana...jadi kalo bencana tu su ada dolo baru BPBD dong tanggulangi.....jadi BMKG tu  dong punya data lebe jelas gempa deng tsunami. Beta rasa nanti kalo BMKG su pelajari profesor Amerika tu pung riset, dan kalo batul su ada kepastian akan  terjadi tsunami, beta yakin pasti dong akan kasih warning ka pemerintah setempat dan pemerintah akan bataria kira-kira kapan dan apa langkah  persiapannya. Jadi mulai dar skarang, jang ale pikiran yang bodo-bodo tu la panik parsis macang kata cacing ada kana kapor bagitu.


OM: Jang sampe dong biking isu tsunami ni par kepentingan laeng...pengalihan isu bagitu....terutama par kepentingan politik....karena ini kan mau jelang Pilpres deng Pilkada Maluku...berita ni kan su termasuk isu nasional ka bukang tamang?


OK: Bisa iya, bisa juga seng.....mar tergantung deng ale pung pikiran saja

OM: Koko e, beta ni su seng takotang lai, mar beta ni pikir akang ana-ana deng cucu-cucu tu kio kalo bencana tu batul-batul  akang datang!

OK: Samua orang pasti pung pikirang bagitu....mar seng usah takotang...sombayang banya saja deng jang biking dosa lai...orang yang kurang  sombayang la biking dosa banya tu...biasanya dong panik la akhirnya dong bisa mampos sebelum bencana tu datang. Ini kan pambodo namanya.

OM: Hmmmm

OK: Beta mau bilang, katong ni su blajar dar tsunami di Aceh. Di Aceh tu kekuatan gempa diatas 8 SR. Saat ini kan su ada sarine peringatan  tsunami yang dipasang BMKG di Ambon....ini dong su biking deng teknologi canggih. Dolo tu orang mampos banya karna masih balong blajar soal  itu....jadi skarang kalo ada gempa lalu ada bunyi sarine, katong capat-capat ambel langkah saribu nae ka gunung jua.....

OM: Bisa lai.....

OK: Oeee....dengar ni bae-bae....beta mau bilang....Mati tu seng gampang tamang. Bencana basar di Aceh deng terakhir di Filipina tu saja ada  yang hidop....katong di Ambon ni mau takotang par apa, tar akang mati kalo katong ni biking bae....karja seng makang pancuri. Kalo ale biking  bae, jang kata tsunami, kiamat jua mau takotang par apa...jadi mampos tu tuangala su ator. Seng bencana, seng saki jua orang bisa mati mo.  Nanti mau ada terjadi apa apa, tuangala su kas tau par katong lewat katong pung mimpi....dan kalo mau terjadi apa apa tu orang di Ambon  biasanya su barasa tamang e....jadi minta hikmat dong!

OM: Jadi antua basar tu nanti kas mujizat ka?

OK: Itu akang sudah....ale tau to katong ni sapa!

OM: Ale tu bicara parsis macang kata orang orang suci satu lai. Dolo-dolo tu ada bajingan minta ampong mo....ale kira beta ni seng tau ale pung  dolo-dolo tu ka?

OK: Oe Maku....itu dolo, mar skarang ni beta su bertobat, jadi su seng takotang lai macang ale bagitu....ale ni takotang karna tiap hari kong  pasang togel tarus....orang biasa inga harta lebe banya dar inga sorga tu biasa takotang mampos....ada pantas kong ale ni lia panik deng isu  bodo tu...

OM: Tamang e....dangke lai. Katong dua su share...deng beta su mangarti. Jadi mulai dar skarang ni beta sadar seng mau biking dosa banya  lai....lalu beta tunggu jua pemerintah dong bataria apa.....

OK: Oke mantap....mulai skarang stop pasang togel tu jua la sombayang banya e!

OM: Mantap tamang.....katong koma lai do, nanti katong baku dapa lai!

OK: Oke....oke....

****Amatooooo****

--wg--