Uros Caretaker Ka Pi Piknik Politik

KAMARENG dolo Om Maku (OM) deng Om Koko (OK) baku dapa di rumah kopi Joas di Jalan Tete Said Parintah lalu dong dua bacarita panjang soal keberangkatan 45 tuang-tuang legislator di Baileo Karang Panjang ka Tanah Batavia.

Dong dua pung topik bahasan ini memang akang lagi rame kaliling carita dari orang-orang yang suka kewel di rumah-rumah kopi maupun penumpang dalam oto-oto angkot di kota cantik sapanggal nih. Akang carita bagini basudara e.!

OM : Koko e beta mau carita par ale nih. Mangkali hari Senin malam waktu beta pulang karja cape-cape dari Kantor di Pasar Mardika, beta langsung nae oto angkot jurusan Kudamati. Waktu oto su bajalang sadiki, ada laki-laki saumor 30-an la kasih stop oto langsung dia naek. Oto bajalang sampe di muka Bank Indonesia, laki-laki kewel tuh dia bilang dia dari Nusalaut. Lalu dia tanya beta: ’’Bro marga apa, asal dari mana?’’. Beta sanyom sadiki lalu skrek dia deng bilang ’’Par apa ale tanya beta kaya bagitu’’?. Mungare tomi-tomi balas beta ’’Seng bro, beta hanya mau tau sa karna katong kan basudara kio’’. Beta senyum-senyum sa biking dia panasarang sadiki.

OK: Lalu laki-laki itu bilang apa lai?

OM: Karna dia su puyeng sadikit deng air kata-kata, mangkali su abis minum sopi satu sloki makanya beta diam sa, beta pura-pura seng tanggapi dia. Karna itu dia ajak sopir par stori. Dia bilang ’’Kawan e ale tahu kaseng, itu 45 anggota dewan pi Jakarta par bikin apa la? Katong bingung lae. Par biking abis kepeng daerah sa. Sopir balas ’’Itu akang sudah’’ seraya mempercepat jalan kendaraannya. Tarus laki-laki itu balik tanya beta ’’Menurut bos, dong anggota dewan pi Jakarta par urosan apa?’’ . Beta bilang dia ’’Dong pi urus caretaker par ganti Wate Kace Ralahalu.

OK: Laki-laki itu taskrek lalu bilang ’’batul lai. Masa kong urus surat sapanggal harus samua anggota dewan terbang ka Batavia. Coba ale bayangkan sa kalo satu anggota dewan dapa kepeng 11 juta rupiah par biaya tiket atau biaya pulsa bung bageang bawah par uros caretaker ganti Wate Kace Ralahalu, lama-lama kepeng daerah abis par dong sa, seng ada orang laeng. Padahal, masyarakat kacil yang lari pukul panta karena takut dapa bawa dari banjir masih banyak yang balom dapa bantuan. Pangungsi jua masih susah di tampa pengungsian, tapi dewan biking piknik politik karna dong pung waktu tugas su mau abis.

OM: Itu akang sudah tamang e. Beta skrek lai dengar dong samua barangkat ke Jakarta hanya par bawa kartas besluit sapanggal. Kalo moral wakil rakyat sa su makang pancuri kaya bagitu bagemana deng katong rakyat kacil ni. Katong pung wakil rakyat nih dong su seng pung parasaan, dong pung hati pait su dapa makang dari anjing sabatang alang. Dasar parlente.!

OK: Kalo cuma uros surat besluit caretaker itu kan urusan dan wewenang antua Menteri Dalam Negeri di pusat, kio. Skarang kan dunia akang pung lebar su kaya daong kelor deng daong patatas sa, tinggal kirim melalui facsimile ka email ka, ka facebook ka, pasti akang sampe jua. Katong baku malawang di sini sampe rutu-rutu tongka langit jua yang pung urosan par tunju caretaker ganti Wate Wace Ralahalu tuh antua Mendagri Gawaman Fausy.

OM: Beta jua herang hanya gara-gara sapa yang jadi caretaker ganti Wate Kace Ralahalu, buta-buta huruf sabatang alang dong kasih komentar miring soal putra daerah deng bukang putra daerah. Ada nau-nau satu kapala karna skolah seng sampe-sampe, skripsi jua mungkin orang lain yang biking, tapi mau bagaya protes pemerintah. Pemerintah tetap pamarintah, rakyat kacil tetap kacil. Toki testa di tembok, kapala nanti yang picah. Katong orang Maluku memang paleng nau-nau. Katong kalah politik dari Pace Chiko deng Pace Denias dong di Papua. Pace deng mace di Papua sana dari kapala air sampe kaki air dong mau tetap putra daerah yang pimpin deng kasih parentah par dong biar dong pung orang tu bicara seng batul-batul, stori kata-kata jua seng sampe-sampe kaya bekas bupati di Masohi tu. Aneh tapi nyata, katong di sini tolak putra daerah. Lalu ale suka sapa par ganti Wate Kace Ralahalu?

OK: Beta nih sapa saja, tapi yang penting orang katong supaya dia tahu segala hal soal katong pung tanoar. Sebab, kalo kasih orang lain balom tantu dia bisa lihat Maluku secara umum, dan balom tantu dia mau tulus melayani. Tapi, beta satuju kalo nanti orang Maluku yang militer jadi caretaker supaya daerah ini tetap aman. Lebe-lebe katong minta antua Mendagri tunjuk ulang Wate Kace Ralahalu par lanjutkan tugas kasih abis pilkada Maluku deng saatnya antua Mendagri lantik gubernur baru.

OM: Batul tamang. Memang seng salah lai, orang Maluku nih laeng kasih jatuh laeng. Katong kaya katang, satu mau nae, satu tarik kasi turun. Pantasan orang-orang di pusat gampang adu domba katong. Ribut basar di Ambon beberapa taong lalu su jadi pelajaran berharga par katong, jang jatuh lai di kolam yang sama. Su bagitu lai tambah katong pung anggota dewan nih dong seng pintar, dong cuma balaga tapi panaku. Kalau mau Maluku majo lebe bae jang pilih dong par pemilu 2014. Katong haros pilih dewan yang bias bela katong pung hal-hal di pusat, jang cuma bagaya deng bastan pake oto gagah deng kaca mata itang.

OK: Tapi samua tagantong basudara samua karna atong pung hak pilih. Kalo katong mau Maluku maju jang katong pilih wakil rakyat yang dong bilang 5 D (datang, duduk, dengar, diam, dan pulang tidor sono).
OM: Satuju saratus kali. Tapi, tamang e jang marah e beta pi Dian Pertiwi par cari kacil pung buku deng pena do jang pulang dia mangamo lai.

OK: Bapa yang bae harus bagitu tamang. Oke, nanti beta kontak ale par katong kewel soal hal-hal basar laeng.

OM: Yoha..!.

Eeeeenggggg.