Punggul Suara Ulang

MULAI hari ini, Rabu, 11 September 2013, samua orang pung parhatian ka Seram Bagian Timur sana. Ini bukang karna di sana ada heneer basar kaya waktu akang kasih ancor Aceh yang dong bilang Sarambi Mekkah tuh pada 24 Desember 2004.

Ini juga bukang karna dong di SBT sana dapa ikang paus tadampar langsong kerko. Mau tau ada apa di sana?

Mari katong ikut perbincangan Om Maku (OM) deng Om Koko (OK) berikut ini:

OM : Tamang…Beta dengar hari ini dong biking punggul ulang suara di SBT ka? 

OK: Batul tamang, seng salah lai.! Konci rekeng ale tau darimana tamang?

OM: Ao jang se kira beta nih buta basar deng politik sabatang alang nih. Ale kira beta seng parnah baca Koran kaapa? 

OK: No kalo bagitu kanapa ale pancing lai? 

OM: Oh, ale nih kaya seng tahu beta sa. Kan maeng politik sadiki kaya ikang bubara koco-koco cakalang sampe lidah kaluar dar mulu kaya dosen pung dasi sa.

OK: Maku kok dilawan. Ada haros beta lia ale nih pikiran seng karuan gara-gara pikir politik.

OM: Ao jang bagitu tamang. Biar katong su umor tapi haros balajar lai to. Kan nene moyang dolo-dolo bilang kejar ilmu sampai usia tua. Lalu beta ada terapkan akang ni kio!

OK: Lalu ale jagokan sapa?

OM: Katong nih kang orang kacil, gaji jua saontal kuli kacang par apa pikir-pikir hal basar. Beta nih sapa saja mau pimpin katong pung negeri nih terserah maar yang panting orang itu jujur, seng parlente, seng makang pancuri alias koropsi, deng seng pakai cara-cara parlente par dapa akang kursi.

OK: Beta satuju deng ale tamang. Sapa yang nanti menang punggul suara ulang di SBT itu terserah, yang penting dong nanti pimpin katong negeri nih deng bae-bae, jang koropsi, jang kasih susah orang kacil, jang hanya bolak-balik hotel-hotel mewah deng barmaeng rambu panjang di tanah Batavia lalu lupa konde-konde angos di sini.

OM: Lalu ale mau pi mana nih?

OK: Beta ada mau antar kacil ka sakolah do. Ini kan su mau jam balajar.

OM: Kalo bagitu katong dua tapisah do. Beta mau ke Rumah Kopi Tempo Doeloe par kewel deng tamang-tamang politisi, tamang-tamang wartawan deng tamang-tamang aktivis mangkali ada info oras ini ka!. 

OK: Bisa lai, ale sa.!

OM: Beta hanya mau cari tahu sapa yang su menang sakarang?

OK: Oke, katong bapisah do e.

OM: Sip tamang. 

Setelah baku pisah deng Om Koko, Om Maku langsung tancap gas ke rumah kopi di Samping Rumah Sakit Gereja Protestan Maluku itu. Eengggg….!!

-----by rosa--