Slamat Jalan Wate Kace deng Om Bib

SU LIMA taong seng terasa voor katong ana-ana di Maluku. Katong pung wate Kace Ralahalu deng antua pung tamang, om Bib Assagaff, hari ini ni su abis waktu vor pimpin katong. Antua dua ni su kalesang katong. Terutama voor wate Kace yang su sapuluh taong, kalesang katong pung pembangunan, deng keamanan yang su mulai kondusif.

Lalu apa kata om Koko deng om Maku lewat bastori dalam baskom Tali Kepang ala Ambon kali ini par wate Kace deng om Bib. Mangente dolo:

OM: Koko e, seng rasa katong pung umor su tambah tua, su jadi tete-tete garonci.

OK: Iya Maku, beta jua rasa bagitu, su mulai maso kapala anam ni….katong su mulai lia takoro, seng sama waktu katong muda-muda dolo.

OM: Hmm…Skarang ni samua su barubah, Koko e. Pembangunan su tambah hari tambah maju pesat. Katong su musti ajar ana-ana ni skarang voor pikir masa depan.

OK: Pembangunan memang tambah maju, tapi beta pung gigi ni akang su tambah longsor samua….untung kata ada tinggal brapa ni…

OM: Sudah jua koko, jang bicara akang lai. Soal pembangunan deng ale pung barang bodo tu akang su laeng carita…

OK: Maku e…katong bicara-bicara, mar hari ini katong pung wate Kace deng om Bib, antua dua su selesai dar tugas jadi gubernur deng wakil. Lalu katong mau bilang apa ni voor dong dua.

OM: Oo..iyo Koko, batul paskali. Terutama voor wate Kace jua, yang su sapuluh taong ni jadi katong pung bapa pembangunan di Maluku. Biar antua pung kekurangan ada, mar antua pung kelebihan jua banya lai. Jadi beta angka jari meme ni jua par antua. Lalu beta mau bilang....dar ujong rambu sampe ka ujong kaki ni, beta atas nama pribadi, keluarga deng basudara samua di negeri ini, katong minta danke banya lai voor wate Kace yang su biking banya di sapuluh taong par katong samua ana-ana cucu di Maluku. Slamat jalan lai, smoga Tete manis selalu menyertai...Amin. Lalu par om Bib, beta jua seng lupa minta dangke lai, mar om masih punya kesempatan to voor jadi tuang tanah di Maluku....mar beta saran, jang lupa sombayang banya.

OK: Maku e…uhuk..uhukk…beta rasa ini waktu perpisahan kio, yang bisa beta kasih par wate Kace, cuma aer mata ni…. beta rasa, beta seng bisa kasih apa-apa ni…. nanti beta pulang kong sombayang jua, biar Tete manis selalu berkati antua pung perjalanan deng keluarga.

OM: Mantap Koko…beta seng paksa ale par sombaya, itu jua lebe bae lai. Mar ingatang, su talanjur janji tu la pulang biking akang jua, jang sampe ale seng biking akang, la satu dua hari ni ada kajadian apa-apa.

OK: Iya Maku, beta janji…beta seng lupa, nanti beta sombayang par wate Kace.

OM: Oke…kalo gitu mantap. Soalnya banya kali katong di Ambon ni bicara saja deng bibir, mar pulang sampe di rumah, maitu su biking hal, la su lupa yang tadi ale su janji tu par sombayang.

OK: Itu akang sudah Maku, katong pung kalakuang dar dolo-dolo tu su bagitu, beta jua takotang lai, jang su sampe di rumah bagini, maitu biking gara-gara, la beta jadi lupa. Kalo bagitu ale jang lupa kas inga beta lewat telpon jua e.

OM: Oke…jang ale manangis lai. Samua yang ada di dunya ni sifatnya sementara. Ada yang datang deng ada yang pi. Kalo jadi ratu deng pangeran sama deng dong di Inggris tu boleh, bisa sampe hari tua… mar jadi gubernur ni dia cuma lima taong saja, mar kalo rakyat suka, akang bisa jadi sapuluh taong, sama deng wate Kace ni. Jadi beta mau bilang, laeng kali kalo ale ada pilih gubernur tu, ale musti buka biji mata lebar-lebar, jang sama kata deng orang buta bagitu, la tusu deng torana sabarang, la abis itu manyasal iko blakang.

OK: Batul Maku, katong ni kan lagi cari pemimpin yang sama parsis deng wate Kace. Mar kamareng tu, beta seng iko pilih lima calon gubernur, karna beta seng dapa undangan.

OM: Sudah jua Koko….itu kajadian kamareng, jang ale bicara ulang paleo lai. Pulang sana, tikang lutu la sombayang, supaya pengganti wate Kace ni bisa lebe moi deng bisa lia katong pung ana-ana cucu. Sombayang minta Tuangala kase katong pung pemimpin yang bijaksana deng seng sombong, deng jang biking diri macang kata pemimpin satu lai, padahal ada pung maksud laeng…

OK: Maksudnya apa tu bung Maku….

OM: Iya to, jadi pemimpin tu harus merakyat, seng koropsi, seng pentingkan diri sandiri, seng munafik deng apa lai…..

OK: Ooo…bagitu e….itu pemimpin yang beta cari.

OM: Oke Koko…beta pung poro ni su mulai saki, barangkali dari siang bolong tadi, beta baraci kua ikang kuning deng papeda talalu banya…jadi beta rasa katong sampe sini dolo.

OK: Wah gawat tu Maku, jang lama-lama batahang….nanti karsang bisa pica….beta seng tahang ale lai, balap sudah.

OM: Mantap Koko, sampe jumpa besok e…jang lupa sombayang, kio!

OK: Mantap!

Amatooo-----

**wage***