Pawela Kasi Pindah Ibu Kota

DENGAN nafas tersengal-sengal Om Maku (OM) beranjak naik mengikuti tangga demi tangga di kawasan Batu Gajah Dalam par sampe di kediamannya di Telaga Raja. Setelah melewati puluhan anak tangga tadi pas di tengah jalan sebelum sampe di rumah, tiba-tiba antua baku tatongka muka deng Om Koko (OK) yang waktu itu mau turun ka kota par balanja hal-hal pribadi.

OM: Tamang e ale mau ka mana su siang tarang nih?

OK: Ao, beta mau bali kacil pung onderdil-onderdil motor deng rook dolo. Ale kan tau malam-malam di sini paleng dingin, apalai baru abis musim ujang. Beta mau bali kacil pung hal-hal barang motor yang beta bali akang pung mur dong su kasih rusak. Mangkali mau iko lomba balapan deng Valentino Rossi kaapa? Ana-ana oras nih dong susah par ator dong lai.

OM: Jang bagitu tamang, namanya jua ana-ana. Tapi, ale nih balom carita kewel sadiki lai ale su mau ka kota.

OK: Lalu ale baru dari mana naik tangga su kaya anjing pung lidah kaluar nih? 

OM: Ohhhh……tadi pagi itu beta turun antar maitua jual ikan di Pasar Mardika la skaligus beta bali Koran Ambon Ekspres, Rakyat Maluku, Suara Maluku, deng Siwalima.

OK: Bapa Tela, ale bali Koran banya itu paskali. Ale nih kutu buku parsis bangsa kakarlak dong lai.

OM: Seng jua tamang. Beta nih kalo seng baca barita satu hari saja beta rasa-rasa mau snewen sa. Beta musti tahu info dolo sabalum beta pulang rumah. Biar katong skaloh seng sampe-sampe kaya di Unpatti bagitu, tapi pengalaman deng pengetahuan katong jang sampe kalah dari dong yang balajar tinggi-tinggi kio.!

OK: Beta satuju tamang. Lalu ada info apa yang paleng moi skarang? 

OM: Seng…..skarang ini orang rame-rame bicara soal titah Wate Kace Ralahalu par kasi pindah ibu kota Maluku ka Makariki, Seram, sana. 

 OK: Lalu menurut ale bagemana yang pas?

OM: Katong nih kan orang kacil. Yang namanya kebijakan pemerintah deng raja tuh pasti akang bae saja karna dong lebe tahu urusan sabatang alang nih dari katong yang skolah seng batul-batul nih. Sebagai orang kacil, beta dukung kebijakan Wate Kace Ralahalu karena antua mau katong pung daerah nih akang dibangun marata di samua wilayah deng antua jua mau katong daerah ini akang ada punya kekuatan politis di pemerintah pusat lai.

OK: Beta jua sataju, tapi paling baik, katong biking survei dolo. Lalu jang lupa kalau samua itu butuh kepeng deng waktu bukan mau laksanakan oras ini. 

OM: Yang beta tahu su ada besluit dari pakar-pakar ITB dari Bandung kalo Makariki tuh akang luas deng paleng layak jadi ibu kota. Akang pung pertimbangan ilmiah karena Kota Ambon talalu kacil, jumlah penduduk deng oto-oto tarus batambah samantara luas pulau seng batambah. Balom lai banyak titik rawan longsor di mana-mana. Ambon jua su banyak pendatang (urban) sampe ada baku tatoki sadikit dong rekayasa par biking basar akhirnya katong yang susah. 

OK: Beta kira pengalaman tahun 1999-2004 deng tatoki-tatoki antarkampung oras ini harus katong biking abis akang jua. Katong akang tarus susah kalo katong seng sadar karna orang-orang licik di pusat sana dong tarus adu domba katong par dong pung kapantingan. Sebenarnya seng ada masalah, cuma nau-nau banyak nih dong biking protes kata Makariki seng layak. Katong pung anggota dewan di Baileo Karang Panjang jua sama, dong seng tau banya soal konsep bangun Maluku yang lebih moi.

OM: Harusnya katong bangga punya Gubernur yang pintar-pintar (visioner) macam Wate Kace Ralahalu. Biar antua mau turun tapi antua ingin titipkan kasih sayang dan hadiah voor anak cucu Maluku. Mana ada gubernur lain yang bikin bagitu, samua cocok jadi penjilat sa.

OK: Katong su musti pindah ibu kota karena secara politik deng ekonomi orang Maluku diuntungkan kalau pindah ibu kota ke Seram yang luas. Ibu kota Negara sa dong mau pindah akang, deng dewan di Senayan dong setuju cuma masih perlu waktu deng kepeng banyak par ator akang. Beta herang pindah ibu kota Negara orang seng talalu baribot tapi pindah ibu kota provinsi katong di Maluku ribot akang. Sebenarnya kan seng perlu par ribot. Satuju kaseng?

OM: Beta kira soal pindah ibu kota nih buta huruf saparu nih dong harus balajar dari Bupati MBD Wate Abas Orno yang karna barani deng pung hati tulus mau kucurkan kepeng satu tahun anggaran par bangun ibu kota kabupaten di Tiakur, Pulau Moa. Kalau Wate Abas Orno bisa biking itu dalam satu tahun kanapa katong seng bisa biking itu par kasih pindah ibu kota Maluku. Seng ada yang seng mungkin kalo katong mau bersatu.

OK: Ya, itulah kakurangan katong di Maluku. Katong paling sanang curiga orang deng seng mau lia lae pung bae deng sanang. Kapan katong mau kalo masih ada pikirang kampong deng pikiran dolo-dolo kaya bagitu.

OM: Jadi ale deng beta satuju nih.

OK: kalau par katong pung anak cucu kanapa seng. Beta dukung Wate Kace Ralahalu par kas pindah ibu kota ke Makariki. Oke tamang beta ka bawah do e su mau siang nih jang sampe oto susah lai. 

OM: Jalang bae-bae tamang. Kalo gitu beta lanjut jua.

OK: Nanti beta bali kopi par sabantar katong sambong carita di beta walang kasiang-kasiang jua.

Amatooo…!

----by ROSA---