Katong Pung Dalang Kampong Su Seng Sama Dolo-Dolo Lai

BASUDARA yang ada dimana saja, yang balong manganto deng yang lagi mangente!

Beta, om Koko mau bastori sadiki dolo tentang pengalaman banjir Ambon yang kamareng tu sempat lipa katong pung kota Ambon. Mar kali ini beta bacarita khusus dari beta pung pengalaman pribadi.

Kali ini, beta minta dong pung pengertian jua, karna biasanya beta (Koko) bicara denga om Maku, mar kali ini, om Maku pung batang idong jua seng dapa lia sadiki lai par katong bacarita onosel. Jadi beta rasa, beta bacarita sengel jua. Oke, beta lanjut e!

Bagini basudara, kamareng tu beta ada pung pengalaman berharga. Saumur-umur beta hidup, balong pernah beta dapa lipa banya dari banjir basar sampe amper sadiki lai beta mampos. “Beta dapa lipa sampe takaruang dapa tar tau jalang pulang. Sampe lutu-lutu ni akang gometar, parsis sama kata deng motor pok-pok yang su kehabisang bahan bakar.”

Waktu banjir tu datang, beta skrek stenga mati, “luar biasa.” Karna aer merah tu, taong ini akang paleng hebat. Jadi beta pikir banjir hener ni akang biasa-biasa saja, sama deng taong kamareng. Eh mar ternyata, aer taong ini ni akang bajingan paskali, hener paleng basar. 

Su bagitu, aer tu yang maso ka beta pung rumah, akang seng minta permisi sadiki lai. Tuangampong pung sayang. Ini aer merah akang maso takaruang dapa. Akang maso dari beta pung muka pintu tanjung, lalu kaluar iko suka ka blakang pintu tanjung. Paleng capat ale.

Jadi saat itu, kalo beta terlambat sacubi saja vor nae di atas soldor. Barangkali beta su seng ada nyawa lai, alias seng ada di dunya ni lai kapa.

Jadi saat bencana itu datang, yah namanya banjir tu kan seng pake mata to, apalai pake perasaan, pokoknya seng ada ampong, seng ada nas, seng ada konci rekeng sadiki lae.

Saat itu, beta pung dalang rumah memang batul-batul dapa varmak, sampe amper dapa beta pung plafon rumah.

Waktu beta su ada di atas soldor, beta pikir su aman, eh mar waktu beta tikang mata ka bawa, beta lia samua berhala di dalam rumah, termasuk beta pung pakiang-pakiang, akang anyo pi par kerko sampe di pante Waihaong sana.

Basudara e…memang banjir kamareng tu akang biking beta ancor lele, ancor di kabong-kabong. Jang bilang akang lai ana e, karna abis banjir tu beta pung dalang rumah ni akang su pono deng sampah deng peci, deng lumpur. Istobat e, badaki deng talamburang.

Lalu yang biking beta stengah mati, ketika beta pung samua dalang rumah tu tarandang deng lumpur, tinggi lutut ni, biking beta pikiran pusing tujuh kaliling.

Trus trang saja, sampe oras tadi ni beta pung pakiang yang bisa beta pake, cuma sisa 10 potong saja. Jadi memang beta rasa stengah mati karna sampe oras tadi ini beta pi ka mana-mana su seng pake akang calana dalang (cada), bagitu jua deng beta pung mamski alias maitu.

Mangarti jua, mamski pung kutang waktu itu jua akang pi sama-sama deng beta pung calana dalam, abis dong tau to, cada deng kutang tu, dong laeng batamang deng laeng kio…hehehe.. Mar untung bae, waktu itu antua mamski tu pung kutang yang anyo, mar kalo antua mamski pi anyo lai, maka ancor sudah di kabong-kabong. Kong dingin-dingin macam bagini lai, kalo seng ada mamski par tola-tola papski pung susah, so pasti papski jadi cilaka. Batul ka seng basudara! Hehehe...

Basudara!! Dolo-dolo tu memang pernah ada banjir, mar seng pernah kajadian sabatang bagini.

Kalo bagitu, beta carita pengalaman waktu masih kacil dolo, kira-kira taong brapa tuh lai….jang marah e, beta su lupa.

Waktu itu, datang banjir basar, sampe amper pernah biking beta cilaka. Mar waktu itu beta pung papa, antu tu saorang ale, seng ada dua.

Antua bisa user akang aer tu tamang, mar suma sayang, antua pake pakatang ale.

Mar sudah jua, oras ini jang pake akang barang bagitu lai, karna beta pikir, dunya ni akang su tarang, kioo. Jadi beta berjanji par tuangala, seng mau pake barang bagitu, sama deng orang tatua dolo-dolo tu lai, nanti biking badaki deng bardosa par tuangala.

Mar biar bagitu, katong pung orang tatua tu dong tu jua tau diri deng paleng kalesang ee, sampe di hal-hal yang sapanggal-sapanggal. Pokokonya, dong ada tau diri lah.

Sebab waktu banjir pi par kerko, dong langsung panggel satu deng laeng di dalam kampong par karja bakti. Pokoknya lumpur deng peci dong varmak sampe licing deng panta tana, pokoknya tar ada kasih tinggal sacubi lai. Karena saat itu dong “gercep” (gerak cepat).

Jadi memang dolo-dolo tu dong paleng kompak eh. Paleng kalesang, laeng paleng dengar-dengar laeng, deng laeng paleng baku sayang deng laeng.

Apa lai persoalan sampah. Biar hujan datang, biar panas tare, biar banjir lai, tetap dong cucur karingat vor cukur kotoran tu sama-sama, yang penting dalang kampong ni akang tetap lia barsih deng neces.

Jadi dolo-dolo tu jang coba-coba buang sampah sabarang, dapa tau la talinga tu akang dapa cubi sampe toher nener, apa lai kong pamalas karna seng mau karja bakti biking barsih dalam kampong, oo…seng dapa ampong sadiki lai, bila perlu dapa sirang deng minya panas dari kuali.

Tadi tu beta bica tentang orang tatua dolo-dolo, mar skarang beta bale haluang jua bicara beta pung dalam kampong sandiri.

Di beta pung dalang kampong, waktu banjir tu akang angka panta pi par setang, katong pung ana-ana tu, dong jua lia parsis sama deng setang tarampa lai. Mangapa beta bilang bagitu? Waktu dong laeng panggel laeng. Beta jua sampe jadi bangga lai, lia dong pung kebersamaan. Mar beta jua ingin mau tau, dong pung kebersamaan tu macam apa??

Waktu beta pi dudu deng dong, beta lia dong su pegang skop deng grobak tola-tola tu, sampe beta pung dalang hati bilang bagini, “bae jua dong mau biking barsih akang dalang kampong ni” karna itu beta biking pendekatan, supaya dong jua bisa karja beta pung kintal spanggal lai.

Waktu itu,  beta ada kasih kepeng sadiki par dong bali rokok. Supaya dong jua ada pung smagat 45 par karja. Batul ka seng, basudara?!

Basudara e, mar seng lama bagini, beta pung dalang hati yang sanang tadi tu, akang su tabulabale jadi ancor. Kanapa, karna skop yang dong pegang tadi tu, akang su baganti deng botol.

Basudara e, sapa seng skrek, sapa seng hati saki karna yang beta lia, dong su mulai torana aer karas tu deng sloki.  Sloki tu akang taputar e kasana deng kamari. Waktu sampe di beta, beta bilang par dong, “eh ana-ana e, beta ni orang tatua, tolong hargai lah beta jua. Minta permisi ka, lalu kalo beta su stuju baru ale kasih.”  Mar beta jua bilang par dong, “sampe jua ana-ana ee, beta su jalani hari tua, su pension deng akang barang-barang  tu, apalai deng parampuang yang ada di tanjung Batu merah sana, beta su tar nodek sadiki lai.”

Katong lanjut!

Jadi beta pung dalang hati, “uang yang beta kasih par bali rokok tadi tu, dong su pasti bali sopi deng akang.”Mar sudah jua, beta ada bapikir laeng, karena kalo memang seng ada barang harang tu par tola-tola angin, nanti dong karja jua seng smangat deng gampang bisa maso angin. Jadi beta mangarti lah.

Waktu aer karas tu maso di poro, beta lia dong su smangat, lalu seng lama bagini dong mulai angka peci. Ada yang skop, ada yang tola grobak. Mar tuhang pung sayang jua, seng lama lai dong su stop karja, padahal baru seper ampa yang selesai.

Beta lia dong su mulai loyo, macang seng ada smangat lai. Beta jua seng mau tagor, karna takotang bisa terjadi apa-apa.

Jadi beta ambel kesimpulan dari kajadiang tadi tu, yaitu kalo aer karas tu akang ada, dong ana-ana so pasti kerja keras, mar kalo aer karas itu akang su abis, maka su pasti dong pung tenaga jua iko abis lai.

Siooo…basudara, begitulah kira-kira kisah hidop katong pung ana-ana di dalam kampong ni. “Seng sama deng dolo-dolo lai.”

Beta minta deng tuhang pung sayang. Terutama par ana-ana muda jaman skarang. “Mari jua, jang katong pung kalakuang iko ana-ana macang bagini. Dunya ni su tambah susah. Hidop sa macam bagini. “Seng makan mati, makan seng jua mati, kio.” Batul ka seng?!

La kalo su susah macam bagitu, pi biking skolah tu akang bae-bae jua ka. La kalo su dapa karja, su dapa hidop, orang laeng lia, kan dong pasti bangga kaseng?? Mar ini seng lai, macam dong seng pernah kalesang dong pung diri bagitu. Macam kacang lupa kuli, macam tangan tu lupa kaki..hehehe..

Oke basudara, beta rasa sampe disini jua beta pung carita. Jang beta lanjut lai, nanti ana-ana yang beta carita tadi ni, dong mangente disini, la dong biking persoalan la farmak beta pung dalang muka lai….

Dangke banya lai, dong su mau baca beta pung carita pengalaman sapanggal ni. Beta rasa deng carita ini, kalo ada basudara dong yang seng rasa terharu, beta minta maaf jua. Lalu kalo ada hal-hal yang kurang srek bagitu, beta minta ampong skali jua.

Smoga bacarita ini bisa berguna par basudara dong samua.

Sampe baku dapa lai di bacarita berikut!  Ing…eeeng…

****wage***