Ibu Kota Pindah Ka Makariki, Ambon Ni Jadi Kota Apa?

SEBELUM lengser dari jabatan Gubernur Maluku, Wate Kace Ralahalu mencanangkan pindah ibu kota Maluku ke desa Makariki, kecamatan Amahai, Maluku Tengah tanggal 14 September 2013 lalu. Ada pertanyaan dar sejumlah kalangan termasuk katong pung ana-ana di Maluku, yaitu kalao Makariki su jadi ibu kota, la kota Ambon ni mau jadi kota apa? Apakah pemerintah deng rakyat ni dong su siap deng bisa tarima kaseng rencana itu?

Om Koko (OK) deng Om Maku (OM) yang adalah orang tatua di negeri ini, dong dua mau bage-bage dong pung pikirang sadiki par katong dolo lewat bastori ala Tali Kepang. Mar kali ini dong dua deng keluarga lagi nikmati piknik di pante Natsepa yang su terkenal deng panorama alamnya yang indah: Mari katong mangente dolo!

OK: Maku e, su lama lawang baru beta ka sini lai….akang pante ni su tambah laeng ka…su paleng rame ale…

OM: Iyo, barang selama ini ale tu pi kamana saja? pardidu kaapa kong hari tua ni seng singgah kamari la bawa cucu deng maitu nikmati sisa hidop tu ka….?

OK: Beta ni pansiong la tar kaluar kamana-mana ale, abis kacil pung kacil ni su tarika di beta pung badang sama kaya ular bagitu, sampe su seng bisa bagara kamana-mana lai, karna itu beta di rumah saja ni. Mar untong bae ada ale to par tongka-tongka beta pung susah!

OM: Ada haros kong ale ni lia tambah putih parsis sama deng kasbi kupas bagitu….

OK: Maku, Ambon ni kang, akang paleng cantik ale… ada pantas kong dong bilang akang “Ambon manise”…..beta ni su pi di tampa laeng, mar Ambon tetap Ambon jua. Makanya beta pung tekat, Ambon ni akang bisa jadi rumah par katong pung hari tua jua….

OM: Jadi ale ni su cinta Ambon?

OK: Bukan cinta lai ale, mar Ambon su di beta pung hati,….bila perlu sampe mati tetap di Ambon.

OM: Ale su baca brita ka blong?

OK: Brita apa tu bu Maku?

OM: Soal Ibu kota Maluku ni, katanya dong mau pindah akang ka Makariki, pulau Seram sana…menurut ale bagemana?

OK: Sudah…beta su tau. Bukan katanya lai, mar dong su canangkan akang kamareng tu la dong su tanda tangan akang pung prasasti tu ale. Ini dong ada mati haros par pindah akang ka sana tu kio….mar dong musti tanya-tanya dolo ka par katong ni masyarakat kata katong ni su siap kabalong?

OM: Iya Koko, beta ni ada pikir bagitu lai….ini kalo dong pindah akang kasa sana, nanti akang lebe maju ka atau lebe ancor lai….samua itu jua kan musti ada dukungan masyarakat.

OK: Itu akang sudah….Beta ni jua balong tau, kata Makariki tu akang macang apa. Ada pante sama deng macang Natsepa, deng Pintu Kota ni ka seng par katong cuci mata. Karna kalo nanti tambah hari tambah sibuk, orang yang stress deng karja kan bisa nikmati pemandangan macang bagini kio.

OM: Hahaha…hahah…ale ni lucu lai…..Mar beta Tanya lai do. Kira-kira ale pung pendapat, kalo ibu kota ni su pindah di Makariki, la kira-kira Ambon ni akang jadi kota apa?

OK: Ale pung pertanyaan tu, beta seng bisa pikir akang skarang…bisa gila. Cape deh….mar kalo ale paksa, beta jua terpaksa jawab, lebe bae akang Ambon ni jadi kota bencana saja…..

OM: Waw…sadis e! Kanapa ale pung pikiran bagitu?

OK: Iya to, beta ni pung mulu tamang….kenyataan kan su pengalaman dua taong ni katong di Ambon kena bencana banjir deng longsor tarus. Abis bencana tu, banya orang jadi susah kio ….masyarakat jua menderita, deng apalai sampe skarang ni sa masih ada pengungsi yang balong pulang ka dong pung rumah. Ini kan jadi masalah to brur!

OM: Iya Batul lai, yang ale bilang ni kan akang pung hal. Mar jawab beta dolo pung pertanyaan tadi…kira-kira menurut ale, Ambon ni akang jadi kota apa? Yang ilmiah sadiki ka, supaya ada pikiran jua par beta pung ana-ana pung masa depan.

OK: Oke…bagini bung Maku, rencana tu kalo ibu kota ni pindah ka tampa laeng, kota Ambon dong mau biking akang jadi kota perdagangan, kota pendidikan dan mungkin juga kota modern. Mar beta pung pikiran ni, kalo katong lia akang dar atas gunung ka bawa, kota Ambon ini akang pas par jadi kota perdagangan sa, karena akang pung teluk ni bisa kapal-kapal basar balabu, misalnya kapal ikan, kapal tengker, deng kapal apa lai. Pelabuhan ni jua dong bisa biking akang tambah sabatang lai mo. Skarang ni, Ambon jua su pung lapangan terbang internasional yang bisa landing dan take off pesawat basar langsung dari dan ke luar negeri. Katong jua pung kekayaan alam masih balong samua digarap. Beta rasa samua itu su ada, tingga diator saja…tinggal perencanaan yang baik. Mar musti ada keseriusan deng kemauan dari pemerintah bagitu jua deng rakyat.

OM: Bisa lai…!

OK: Mar beta rasa , itu samua dar katong pung diri sandiri, karna yang bisa bangong akang katong pung kota ni, cuma katong pung ana-ana daerah. Di Ambon ini kan banya katong pung ana-ana yang su pintar-pintar skarang. Dong jua su pi skolah sampe ka dunya luar deng su dapa sarjana. Kanapa musti pi ambel orang laeng lai par bangong akang kota ni… pake dong saja to. Mar cuma sayang ale, katong pung ana-ana ni lai jua ada yang masih nau-nau,….dong ada yang pamalas deng skolah jua tar batul-batul satu lai, lalu su bagitu dong iri satu deng laeng.

OM: Stuju Koko…ini yang katong bilang ikang makang ikang kio…orang laeng su jadi pintar deng mau maju, mar ada orang pambodo seng mau lia orang maju, laeng hati saki laeng par biking ancor saja… akhirnya apa, dong yang pintar tu su tar nodek deng seng mau pulang lai par bangong dong pung daerah ni lai.

OK: Batul ale Maku….Kalo dar dolo-dolo tu dong laeng dukong-dukong laeng, laeng sayang-sayang laeng deng seng rakus macang kata tikus got bagitu, beta rasa katong ni su mantap dar dolo-dolo kapa. 

OM: Itu kang sudah…mar skarang ni beta dengar katong masih laeng ada lur-lur laeng. 

OK: Itu karna dong blong sada....kalo dong masyarakat ni su sadar dar skarang, beta rasa seng perlu kas pindah akang kota ni kio. 

OM: Itu sudah…satu lai yang beta mau kas inga…pemerintah tu jua musti gandeng masyarakat, jang masyarakat tu bajalang ka kiri, pemerintah dong bajalang ka kanan….Pemerintah harus lia itu rakyat. Kalesang rakyat sadiki, jang kalesang yang laeng saja.

OK: Batul Maku, rakyat ni kan bukang pot bunga par hias kota ni. Rakyat ni kan pung mata, pung talinga, pung otak deng pung perasaan. Jang biking dong kecewa. Ini persoalan kacil, mar musti pikir kang lai.

OM: Ooo iya Koko…beta usul satu lai. Kalo Ambon ni mau maju deng jadi kota Modern …. Bagemana kalo di lima kecamatan itu dibiking kota saja. Maksudnya kota kecamatan (kota kacil). Jadi masing-masing kecamatan tu deng akang pung pasar, biking terminal disana, rumah sakit, biking supermarket. Karna beta lia sampe skarang, pasar tu macang akang cuma sabiji areng-areng, maksudnya Mardika tu ale. Samua orang kan sorong diri kasana macang sama deng gete-gete urung “tai” bagitu. Akhirnya apa, skarang mau ator lai kan su stenga mati. Macet sana-sini…la katong samua jadi pusing sandiri.

OK: Ooo itu pikiran bagus ale….

OM: Sudah jua Koko…dar tadi katong bacarita sampe lupa lia cucu-cucu ni lagi barnang…beta takotang ada ombak basar ni, jang sampe dong dapa hela la tacolo, la katong susah baru lai….

OK: Oke, ale uros dong dolo, beta lai mau colo panta deng badang ni…suapaya pulang langsung sono…

OM: Mantap ale.

Amatooo…..

*** wg***