Gara-Gara Udi, Opi, deng Oba

TANTA Aga (TA) marah-marah par antua pung ana-ana karna su saminggu seng pulang rumah. Waktu cuci piring ada bamulu sandiri, Om Maku (OM) deng Om Dullah (OD) lewat parsis di Tanta gaul ini pung muka rumah. Parbincangan panjang akhirnya malatus di pagi-pagi tu…

OM: Aga eee…..se kanapa nih sampe pagi-pagi lai su bamulu kaya bobara bikin air masin mandidi panas-panas?

TA: Astanaga naga kamong dua dengar lai? Iyo alee….beta ada rewel satu napas deng beta pung kacil-kacil nih….dong su satu minggu nih seng pulang rumah. Seng tau pi kuliah karja nyata ka bakulia nyata-nyata di kabong-kabong? Beta snewen lai…!

OD: Jang talalu marah-marah nanti orang bilang tadi malam seng dapa kappa?

TA: Is kutok voor se….se bilang beta bagitu paskali. Maaf la yauuuu……mau dapa ka seng dapa beta santé sa..!

OM: Dapa apa dolo?

OD: Dapa porkas ka togel?

TA: Iskrek se su mulai sabarang lai Dullah!

OD: Daripada se rewel kaya buntiana pohon sukong lebe bae se kasih nomor la beta pasang akang mangkali dapa ka?

TA: Jang marah e….beta seng hobi deng tante udi pung urosan. Bikin hidup susah sa. Ale su baca Koran ka balom?
OD: Koran apa lae?

OM: Berita apa Aga eee..? Ale su kaya wartawan bae-bae satu lai.

TA: Itu yang om polisi mau parkosa parampuan tanah tinggi yang jual kupon judi togel.

OD: Itu akang pung masalah apa lae?

TA: Seng tahu om poli tuh antua kesetanan atau nafsu su seng bisa uros sampe bagitu.

OM: Maksudnya?

TA: Sudah jang dong tanya lae…Beta cuma mau bilang par kamong dua to jang kasih kamong ana-anak barmaeng deng tanta Udi, Om Opi, deng tanta Oba karna dong yang biking rusak ana-anak dong pung masa depan.

OM: Tapi skarang nih Judi, Sopi (minuman karas) deng Narkoba akang su jadi panyaki masyarakat yang susah par cari jalan kaluar.

TA: Sapa bilang? Samua tu tapulang par katong orang tatua sa. Kalo bina ana-anak deng bae lalu kasih dong pi ibadah tiap Jumat deng Minggu pasti dong seng biking orang tatua kapala saki la kirim ka nania sana.

OD: Iyo ale beta satuju deng Aga lae. Beta jua pusing lia beta ana-ana pulang malam-malam jang sampe dong su batamang deng Tanta Udi, Om Opi deng Tanta Oba.

OM: Lalu kira-kira bagemana? Bukankah yang beking akang nih om poli dong?

TA: Biar dong mau beking ka biking ka tapi kalo katong kuat kase nasehat par ana-ana dong seng gampang tagoda rayuan orang laeng.

OD: Katong sapakat. Oh iya jang marah Aga eee…katong dua mau pi kewel sadiki di walang kopi Sibu-Sibu sadiki do mangkali ada rambu panjang mayang angos nanala sadikit la par kasih sanang hati kio…..

OM: Lanjot jua Aga ee

…………eenggggggg…!!!!!

----by ROSA---