Ganti Kapal Tu Jua, Akang Su Talalu Tua

Ilustrasi Kapal Ambon

SEBUAH kapal penumpang berukuran kecil dijadikan sebagai satu-satunya sarana utama untuk menghubungkan seluruh kabupaten di Provinsi Maluku. Kapal kecil yang cantik itu bernama “KM Ambon.”

Meski dengan usia yang sudah tua, namun Kapal tersebut kini masih dioperasikan pulang pergi mengangkut penumpang dan barang ke seluruh kepulauan yang ada di Provini Maluku.

Kapal yang dirancang itu memang tidak dilengkapi dengan teknologi modern untuk mengarungi lautan  bebas dengan ombak besar dan ganas yang ekstrim setiap tahun, sehingga oleh sebagian penumpangnya menganggap kapal tersebut tidak layak lagi untuk melayari ke setiap tujuan. Namun oleh sebagian penumpangnya, kapal tersebut masih dipertahankan karna nilai sejarah yang tidak bisa dilupakan.

Apakah kapal tersebut masih layak, dan bisa dipertahankan lagi di era seperti ini atau tidak? Mari katong ikuti apa kata om Koko (OK) deng om Maku (OM) lewat sebuah ilustrasi Bastori Tali Kepang ala Ambon. Mangente dolo:

OK: Maku e…ale dar mana ni kong lia kele akang barang banya-banya tu?

OM: Koko e… ale macang seng tau saja, beta ni kan su biasa bola-bale ka tenggara sana par lia akang maitua pung kabong, ini kan su waktu par tanoar kio.  Mar sudah jua… hari ini beta terpaksa batal rencana tu, nanti kong tunggu sampe ada kapal sabatang baru beta ka sana.

OK: Barang ale tadi tu rencana mau nae kapal apa la?

OM: Beta tadi tu mau nae KM Ambon tamang….mar sudah jua. Kapal tu su lia tua, akang jua lia kacupeng ale, balong lae penumpang su pono sasa kiri-kanan deng akang barang. Beta takotang, ini kan lagi musim omba kio…jang sampe katong samua tacolo!

OK: Lalu mau tunggu sampe kapan?

OM: Sampe ada kapal sabatang datang to!

OK: Mau tunggu kapal sabatang…kapan?

OM: Tunggu sampe pemerintah kas datang akang kiooo….

OK: Hahaha….tamang, ale ni mimpi kapa!

OM: Sudah jua tamang e…dar pada mati konyol

OK: Stuju ale! Mar beta ni herang tamang….kapal tu akang su lia sacupeng, su tua…mar dong mo paksa toma saja. Su bagitu lai dong kas nae penumpang deng barang su labe dar kapasitas. Ini dong karja macang kata seng ada pung tuang bagitu…coba kalo ada kajadian omba sabatang, la kapal deng penumpang tu jadi apa lai?

OM: Itu sudah tamang e….su banya pengalaman yang katong lia kio. Amper par tiap taong tu pasti ada kajadian kapal tacolo deng omba sabatang.

OK: Memang batul Maku. Lebe bae ale tunggu sampe ada kapal basar baru ale pi ka tenggara sana. Ale kan balong rasa tacolo kio, la ikang-ikang galojo ni yang ada di lautang sana cikar ale pung isi poro.

OM: Hahahaha……memang ikang-ikang skarang ni biar akang su skolah di Unpatti lai, mar kalo dong su lapar, tetap saja ale jadi dong pung makanan.

OK: Maku e….kapal tu akang su tolong-tolong katong pung susah banya ale, mar skarang ni akang su tua. Su seng bisa bawa katong ka mana-mana lai. Akang pung masin pung onderdil tu jua su seng jual lai skarang. Katong lia akang kapal tu katong kasiang lai ale, karna akang mau maju sa su hosa, kong mundur jua bagitu lai.

OM: Batul Maku…setiap penumpang yang nae akang kapal tu jua dong su mulai bamulu lai, abis akang kapal tu su lia badaki deng sampah. Kong orang mau tidor sono bae-bae jua tar bisa lai, su baribot, su sasa deng seng ada tampa lai tamang, jadi terpaksa kong orang-orang baku soso jua.

OK: Beta lia macang akang kapal tu dong jua tar uros akang bae-bae ka! Setiap saat musti ada yang babanting mulu, macang ale bagini. Jadi beta mangarti lah kalo ale seng mau nai akang kapal tu lai!

OM: Iya tamang e….Jadi bagemana ni Koko. Beta rasa katong usul jua par ganti akang kapal tu deng kapal laeng yang sabatang supaya katong samua ni bisa pi sampe koliling dunya.

OK: Beta rasa itu usul yang bagus tamang. Karna skarang mau pi di Jawa tu jua musti nae kapal basar ale, apalai kong sampe di Singapur sana.

OM: Koko….orang-orang skarang ni kan dong mau nai kapal tu yang super capat par sampe ka tujuan, supaya seng ilang waktu kio. Kapal yang dong nai jua musti punya fasilitas yang lengkap deng musti akang lia mangkilat. Orang skarang ni jua kan dong butuh yang bagus-bagus, pelayanan yang bae par sampe ka tujuan. Penumpang tu harus ada rasa nyaman, supaya laeng kali lai dong penumpang tu mau tarus nai akang kapal tu. Mar kalo kapal su tar pung fasilitas pelayanan yang bae deng badaki macang bagitu, beta rasa penumpang su tar nodek lai kapa. Dong pung hati akang nae-nae.

OK: Batul Maku…skarang ni pemilik kapal dimana-mana tu dong jua ada berlomba-lomba par dapa penumpang yang banya supaya dapa untong basar to. Makanya dong musti sediakan kapal yang moi. Mar beta herang, knapa kong pemilik KM Ambon ni dong seng perhatikan itu, ada haros kong penumpang yang su biasa nae akang kapal tu dong su pastiu.

OM: Iya Maku…penumpang ni dong kan su tambah canggih kio, jadi dong mau akang kapal ni ganti deng kapal laeng.

OK: Tapi beta jua herang tamang….ada penumpang jua yang masih mau nae akang kapal tu?

OM: Koko ee….penumpang yang modern ni dong seng pambodo par mau nai akang kapal tu lai. Rugi tamang....

OK: Hahaha….katong ni jang sama deng kata orang yang balong goso gigi deng balong mandi bagitu. 

OM: Memang akang kapal tu su bantu katong banya lae par bola-bale tenggara, Seram, Buru, Saparua, Haruku deng Nusalaut. Mar skarang ni su seng bisa kase bae lai. Ini zaman kan su modern. Memang katong seng boleh lupa akang kapal tu kalo su ada kapal laeng.

OK: Batul Maku, mar akang pung sejarah jua seng bole katong lupa akang. Mantap tamang….jadi lebe bae ale tunggu jua sampe dong pemerintah tu bawa datang kapal basar, la ale pi tanoar.

OM: Sip!

OK: Kalo bagitu, ale pulang jua la taru akang barang-barang tu dolo, supaya katong dua bicara lai di rumah kopi sadiki.

OM: Oke Maku….beta ator akang ni dolo kio….

---Amatooo---

***wg***