Galoba Pake Sasi

DUNYA ni akang su paleng tua sampe orang-orang su seng taku biking akang talamburang. Dosa jua su paparipi di mana-mana, sampe ana-ana kamareng sore seng tahu kalesang diri, dong su seng tahu sopan santun lae, lipa sabarang sa yang panting tujuan tarcapai. Ini yang biking orang tua-tua pusing tujuh kaliling.

Om Maku (OM) deng Om Koko (OK) jua bingung par uros tanoar sapanggal nih. Dong sapakat dudu di Rumah Kopi Joas di Pangkalan Taxi lalu tarlibat kewel sadiki.

OM: Koko eee…..ana anak sakarang ni dong su paleng smerlap….

OK: Aooo……tamang e…….. jang se kasar bagitu…!

OM: Bagemana beta seng marah. Coba ale bayangkan di jalan-jalan raya ana-anak dong balap-balapan seng taku mati lae. Dong seng pastiu mangkali Nene Ota menyabarang jalan la dong tabrak antua ka. Dong pikir nyawa nih ada jual di Toko Buku Dian Pertiwi kapa? Kalo katong lia berita di koran-koran yang mampos sasaja cuma ana-anak nae badan sa, orang tatua kurang.

OK: Batul lae tamang eee….Beta kira samua tapulang par katong orang tua sa. Kalo kase manja ana-ana deng kakayaan pasti akang bagitu. Balom lae ana-ana skarang ni dong seng mau dengar orang tatua. Jangankan orang tatua, Tete Manis jua dong seng pastiu sampa hari minggu ada ibadah dong kasi bunyi kanalpot motor kaya Valentino Rossi ada iko balapan liar di muka Gong Perdamayan Dunya bagitu.

OM: Ini yang Bangsa Kakarlak di Walanda, Amerika deng Ostralia dong bilang galoba sasi.

OK: Nau-nau bukan galoba sasi, tapi globalisasi.

OM: Oh bagitu ka….beta kira galoba dapa sasi. Lalu musti bagemana tamang eeee?..

OK: Samua tapulang ke orangtua sa. Kalo orangtua smerlap pasti ana-anak jua smerlap. Pambinaan tuh kan dari dalam rumah tangga baru akang ka luar di sakolah-sakolah, di tampa-tampa ibadah. Coba ale liat Ahmad Dani punk ana laki-laki tuh karena orangtua talalu kase manja sampe dia tabrak orang sabarang dapa di Jakarta. Su bagitu baru bilang karena dia su cere deng Maya Estianti la biking AQJ ka Dul tu dia pikirang. Iskrek sakarang polisi mau tahan AGJ Ahmad Dani bilang siap dampingi dia pung kacil di hotel prodeo. Air su di batang leher baru bicara….
OM: Beta lia skarang nih karna apa yang tadi ale bilang tu (globalisasi) motor-motor su tambah banya di Ambon. Padahal, jalang seng batambah. Su bagitu lae sopi pawela kaliling dari rumah ka rumah sampe biking ana-anak mabo tralala.

OK: Kalo katong seng sadar par kase bina ana-anak bukang seng mungkin tapi pasti ana-anak katong di Ambon nih dong hidup seng pung adat, takaruang, ancor talamburang. Konci rekeng lama-lama katong pung generasi panarus nih dong lanyap jua. Tuheng eeee….!

OM: Ampong jua heloooo…… orang tatua, pandeta, ustad, guru-guru deng pamarentah harus satu langkah par ator samua nih. Kalo seng globalisasi bawa bancana deng hener basar par katong di Ambon nih.

OK: Beta satuju tamang ee…..kalong seng sakarang kapan lae, kalo bukang katong sapa laeeeee…?

OM: Jadi hari Sabtu tu harus ada meditasi di dalam kaluarga.

OK: Ale sa seng parnah pi gareja mo. Konci stori jua ale seng inja akang bagema ale mau kasih nasihat par ana-ana.

OM: Se su parsis pandeta sa…! Jang jadi mayor jendral suanggi par kasih hokmat sabarang orang tamang…

OK: Bukan bagitu, tapi katong laki-laki nih kan kapala keluarga jadi kasalamatan perahu rumah tangga nih kan di katong, bukan yang laeng.

OM: Ini saran bagus lae….Oke tamang beta pi pasar mardika par lia cili deng ikang kawalinya do, mangkali pulang maetua bikin akang par batamang deng papeda panas sabale jua.

OK: Katong break do ee

……enggggggg…….!

----by ROSA---