Dong Su Ator Akang Samua

OM Maku (OM) deng Om Koko (OK) nih dong dua seng abis pikir dunya politik Maluku gara-gara yang dong bilang punggul suara ulang di Kabupaten Seram Bagian Timur sana tu akang jua bajalang seng sasui orang-orang kacil pung harapan. Komisi Pemilihan Umum Maluku jua dong talalu sok lai, seng mau dengar orang, deng dong kayaknya su ator akang dunya sapanggal nih deng dong pung kapantingan sampit. Karna itu Om Maku capat-capat pi di Om Koko pung rumah lalu dong dua bicara sabatang hal soal punggul ulang di SBT.

OM : Koko e…..coba ale dengar do.! Ini KPU nih dong biking apa saja sampe punggul suara ulang di SBT saja akang masih bajalang deng hal baru lai.

OK: Tamang e….itu akang e…..katong jua bingung, seng tahu mau parcaya sapa? Ka situ dong bilang laeng, ka sana dong jua bilang laeng. Jadi katong nih mau basandar tendreng stori par sapa? Samua seng jalas abis.

OM: Lalu menurut ale bagemana?

OK: Sio…katong nih kan orang kacil….jang talalu pikir basar-basar. Kalo cuma makang ikang gete-gete mar jang stori makang bobara welhelmina. Stori tu apa adanya saja. Beta rasa KPU jua talalu pawela kaapa?

OM: Yang ale maksud tu bisa lai……beta jua lia akang dari kamuka sampe ka balakang nih bagitu. Kayanya KPU dong su ator par kasih ancor Om Herman deng Bapa Daud sopaya rencana busuk orang-orang par kasih masuk embel-embel blacklabel ka dalam politik pilih bapa tiang di Mangga Dua kio…!

OK: Ternyata ale jua pung radar kombat parsis Rambo dari utang Seram sana tajam lai. Memang batul, KPU dong su ator biar nanti di putaran kadua seng akan terjadi kaco-kaco. 

OM: Ah…tapi itu seng bagus lae. Masakan katong mau bangun katong punk tanoar sandiri musti pake kacamata kaya bagitu lae. Kapan Maluku majo kalo ada orang masih bapikir dolo-dolo deng kaya orang blakang tanah sana.

OK: Ya, mau biking apa lae….samua dong su ator jadi katong mau biking apa?

OM: Justru katong harus lawan politik kotor kaya bagini.

OK: Tapi deng cara apa tamang..?

OM: Katong minta dukungan masyarakat par minta pertanggungjawaban moral KPU melalui katong pung tete ompong dong di gadung sabatang alang di samping patong Ua Ata Tiahahu di Karpan. Katong harus paksa dong par minta KPU bertanggung jawab soal urosan ini. Ini bukang hal enteng-enteng sa….ini soal katong pung masa depan Maluku.

OK: Kalau katong pung wakil rakyat seng mau biking itu, lalu katong mau biking apa?..... 

OM: Katong bilang masyarakat jang pilih dong lae tahun 2014 nanti. Dong seng mampu bawa perobahan par Maluku.

OK: Tapi….beta seng yakin nanti pilkada putaran kadua ni akang bajalang deng bae. Bisa-bisa pilkada dapa tunda sampe 2015.

OM: Loko bae punggul ulang par samua jua…..mulai dari nol.

OK: Ale kira gampang-gampang saja kapa?.....

OM: Bukang tamang, tapi masyarakat su seng paduli deng pilkada lae. Dong justru bilang kalo putaran kadua katong golput sa. Maaf beta seng provokasi orang.

OK: Beta jua seng skrek lae dengar akang pilkada nih. Bastan labe waktu tusu beta pi uang nae duriang.

OM: Duriang apa yang masih ada musim di ujang-ujang kaya bagini. Kalo nanti putarang kadua beta seng tusu di TPS, beta tusu aniong mai jua kappa….

OK: Smerlap par os…..

OM: Hehehehehehe…..

Karna seng ada pokok carita par jalan kaluar, Om Maku deng OM Koko pulang tidor di rumah masing-masing.

Enggggggggggg….

By ----rosa---